གཙོ་འཛིན་གྱི་གསུང་བཤད། | ཅིའི་ཕྱིར་ "Trace" ཞེས་འབོད། | དམིགས་ཡུལ་དང་ལམ་སྟོན་གྱི་རྩ་དོན། | ནང་ལ་ཞུགས་པ། | ལོ་འཁོར་གྱི་སྙན་བསྡོམས།

ཚོགས་གཙོའི་གསུང་འཕྲིན།

president of Trace Foundation

ཀུན་ཕན་ཐེབས་རྩ་ཚོགས་པ་ཐོག་མར་སྤྱི་ལོ་༡༩༩༣ལོར་འགོ་འཛུགས་སྐབས། དེ་ནི་རང་ཉིད་མི་སྒེར་གྱི་མྱོང་བ་གཞིར་བཟུང་བའི་བསམ་ཚུལ་དང་སེམས་ཤུགས་གཅིག་བསྡུས་ཀྱིས་གྲུབ་པ་ཞིག་ཡིན། ལོ་ངོ་འགའི་སྔ་རོལ་དུ། བདག་མདོ་དབུས་མཐོ་སྒང་དུ་ཐོག་མར་ཡུལ་སྐོར་པ་དང་དེ་ནས་དབྱིན་ཡིག་དགེ་རྒན་བྱས་ཏེ་མི་ལོ་རེ་ཟུང་ལ་བསྡད་ཅིང་། སྐབས་དེ་དུས་ང་རང་ལ་རྒྱལ་སྤྱིའི་མཐུན་འབྲེལ་ཚོགས་པ་ཁག་གིས་བོད་ཡུལ་དུ་སྒྲུབ་ཐུབ་པའི་བྱ་གཞག་ཡོད་པར་ངེས་ཤེས་རྙེད།

ཀུན་ཕན་ཐེབས་རྩ་ཚོགས་པ་ནི་ང་རང་ཉིད་ཀྱི་སྐབས་དེའི་ཉམས་མྱོང་ཁག་གཞི་རྩར་བཟུང་བའི་ཐོག་གྲུབ་པ་ཞིག་ཡིན་ལ་ད་དུང་ཡང་མུ་མཐུད་དུ་ཉམས་མྱོང་དེ་དག་གཞི་རྩར་བཟུང་སྟེ་འགྲོ་བཞིན་ཡོད། ཉམས་མྱོང་དེ་དག་ཀྱང་ང་རང་ཉིད་ཀྱིས་བོད་ཀྱི་རིག་གནས་དང་སྤྱི་ཚོགས་འཚོ་བ།དེ་བཞིན་རང་བྱུང་ཁོར་ཡུག་བཅས་ལ་བཅངས་པའི་བརྩེ་བ་དང་། བོད་མི་རྣམས་ཀྱིས་གདོང་ལེན་བྱེད་དགོས་པའི་དཀའ་ངལ་དག་ང་རང་ཉིད་ཀྱིས་ཀྱང་མྱངས་པའི་མྱོང་བ། དེ་བཞིན་རང་ཉིད་ཀྱི་སྤྱི་ཚོགས་ལ་ཞབས་འདེགས་ཞུ་མཁན་རྣམས་ལ་ང་རང་ཉིད་ཀྱིས་བཅངས་པའི་མོས་གུས་བཅས་ལས་གྲུབ་པ་ཞིག་ཡིན། ལོ་ངོ་འདི་དག་རིང་ལ་ང་རང་གི་རེ་བ་ནི། ཀུན་ཕན་ཐེབས་རྩ་ཚོགས་པས་ས་གནས་མི་དམངས་ལ་ཁ་དོན་མཚུངས་པའི་རོགས་སྐྱོར་ཞིག་བྱེད་ཐུབ་རྒྱུ་དེ་ཡིན་ལ། རོགས་སྐྱོར་དེ་ཡང་ཕུགས་རྒྱང་རིང་བའི་ནུས་པ་ཡོད་ལ་འཛམ་གླིང་གི་ཆ་ཤས་འདིའི་མཛེས་སྡུག་གི་སྤུས་ཀ་ལྡན་པའི་ཐུན་མིན་འཚོ་བར་གསོན་ཤུགས་རྒྱས་པར་བྱེད་ཐུབ་རྒྱུ་བཅས་ཡིན།

ཡར་རྒྱས་སམ་འཕེལ་རྒྱས་ཟེར་བ་ནི་མདོར་བསྡུས་ནས་བཤད་ན་མི་ཚེའི་སྤུས་ཀ་མཐོར་འདེགས་གཏོང་རྒྱུ་དེ་རེད། སྤྱིར་ཐོགས་རེག་ལྡན་པའི་སྣང་ཚུལ་ཏེ།སློབ་གསོ་དང་འཐུང་ཆུ། དེ་བཞིན་དཔལ་འབྱོར་གོ་སྐབས་སོགས་ཐོབ་ཐབས་བཅས་ཀྱི་ཐོག་ཤུགས་སྣོན་རྒྱག་རྒྱུ་ནི་ཧ་ཅང་གལ་ཆེ་བའི་གནད་དོན་ཞིག་ཡིན་པ་སྨྲོས་མ་དགོས་མོད། འགྲོ་བ་མིའི་མྱོང་སྟོབས་ནི་ཐོགས་རེག་ཅན་གྱི་དངོས་པོ་ལས་འདས་ཡོད། དེ་ཡང་རིག་གནས་འཚོ་བ་དང་འབྲེལ་འདྲིས་བྱེད་པ་ནི་མི་ཞིག་གི་བདེ་དོན་ལ་མཚོན་ན་འབྲལ་ཐབས་མེད་པའི་ཆ་ཤས་ཤིག་ཡིན་ལ། ཁྱད་པར་དུ་རིག་གནས་ལོ་རྒྱུས་དང་སྤྱི་ཚོགས་འཚོ་བ་གཉིས་ཀྱི་བར་དུ་འབྲེལ་བ་དམ་ཟབ་ཡོད་པའི་འཛམ་གླིང་བོད་ཀྱི་ཡུལ་གྲུ་ལྟ་བུར་མཚོན་ན་དེ་བས་ཀྱང་ཁ་འབྲལ་ཐབས་མེད་པ་ཞིག་རེད། རྒྱུ་མཚན་འདིའི་དབང་གིས་ཀུན་ཕན་ཐེབས་རྩ་ཚོགས་པའི་ལས་གཞི་ཁག་གིས་རིག་གནས་དང་ཡར་རྒྱས་གྱི་འབྲེལ་ལམ་ཐོག་ཏུ་ཤུགས་སྣོན་བརྒྱབ་སྟེ་སྣ་གཉིས་ཀར་ཕན་པའི་ལམ་ཞིག་འཚོལ་གྱི་ཡོད་དེ། ང་ཚོས་ནམ་ཡང་རིག་གནས་དང་ཡར་རྒྱས་གཉིས་མདུན་སྐྱོད་གཅིག་ཏུ་སྦྲེལ་ཏེ་མདུན་སྤྱོད་བྱེད་དགོས་པར་ཡིད་ཆེས་བྱེད་ཀྱི་ཡོད།

ང་ཚོའི་ལོ་རབས་དང་པོའི་འགུལ་སྐྱོད་ཁྲོད་ང་ཚོས་ང་ཚོའི་རྩ་དོན་དང་མཐུན་པའི་ལས་ཀ་བྱེད་བཞིན་པའི་རྒྱལ་སྤྱིའི་ཚོགས་པ་ཁག་དང་ས་གནས་ལས་ཁུངས་ཁག་ལ་རོགས་དངུལ་སྤྲད་ཡོད།སྤྱི་ལོ་༢༠༠༤ལོར། ང་ཚོས་ཚོགས་པ་རང་ངོས་ནས་ལས་གཞི་སྤེལ་འགོ་བརྩམས་ཡོད་ལ་དེས་ད་ལྟ་ང་ཚོའི་ཕོན་ཆེ་བའི་ལས་ཀ་དེ་མཚོན་གྱི་ཡོད།ལས་གཞི་ཐད་ཀར་སྤེལ་བ་འདིས་ང་ཚོ་རང་ཉིད་དང་ལས་རོགས་གཉིས་ཀར་ཕན་ཚུན་ལ་བློས་འཁེལ་མིན་ཐོག་ཁག་ཐེག་བྱས་པ་མ་ཟད་བྱ་བ་ཚང་མ་རྩ་དོན་དང་ཉེ་སར་འཛིན་ཐུབ་པའང་བྱས་ཡོད།

ང་ཚོའི་ལས་གཞིའི་ཁྲོད་དུ་ང་ཚོས་ཕན་ཚུན་བརྩི་བཀུར་དང་མཉམ་འབྲེལ་གཞི་རྩར་བཟུང་བའི་ཐོག་མི་དམངས་ལྟེ་བར་འཛིན་པའི་བྱེད་ཐབས་བཀོལ་གྱི་ཡོད་ལ། ང་ཚོས་རྩ་དོན་འདི་དག་ནི་ང་ཚོའི་ལས་གཞི་ཁག་ལམ་ལྷོངས་འབྱུང་བའི་གཞི་རྩ་ཡིན་པ་ཙམ་མ་ཟད་ཡར་རྒྱས་ཀྱི་ལས་ཀ་སྤྱིའི་ཆ་ནས་བཤད་ནའང་འདི་དག་ནི་རྒྱལ་ཁའི་སྔོན་འགྲོ་ཡིན་པར་ཡིད་ཆེས་བྱེད་ཀྱི་ཡོད། ཕན་ནུས་ཅན་གྱི་ཡར་རྒྱས་ནི་ས་གནས་ཀྱི་ཐོན་ཁུངས་༼མི་ཤུགས་དང་རྒྱུ་ཤུགས༽དང་ནུས་ཤུགས་གཞི་རྩར་བཟུང་བ་ཞིག་ཡིན་པ་ལས་འཕྲལ་དགེ་ཕུགས་འཕུང་དང་གཞན་རྟེན་ཡར་སྐྱེད་མིན། ང་ཚོའི་ལས་གཞི་ཚང་མ་ས་གནས་མིའི་མཉམ་ཞུགས་ཐོག་ནས་ངོས་འཛིན་དང་འཆར་གཞི་འཐེན་པ་ཞེ་གཅིག་ཡིན། ལས་གཞི་སྤེལ་འགོ་ཙམ་ཡང་མ་བཙུགས་སྔོན་ནས་ས་གནས་མི་དང་མཉམ་དུ་ལས་གཞི་འཆར་འགོད་དང་གནས་ཚུལ་ལ་དཔྱོད་གླེང་དང་།དེ་བཞིན་གལ་ཆེན་རང་བཞིན་འདེམས་གསེས་བཅས་བྱེད་ཀྱི་ཡོད། སྔོན་སོང་གི་རྒྱུ་མཚན་འདི་དག་གི་དབང་གིས།ས་གནས་སྤྱི་ཚོགས་ནི་དོན་དམ་པའི་རང་ཉིད་ཀྱི་འཚོ་གནས་ལེགས་བཅོས་བྱེད་མཁན་དང་རྒྱུན་འཛིན་བྱེད་མཁན་ཡིན་ལ། འདི་ལྟར་ན་ད་གཟོད་ཡར་རྒྱས་དེ་དོན་སྙིང་ལྡན་པ་དང་ཕུགས་རྒྱང་ལྡན་པ་ཞིག་ཡོང་བ་ཁག་ཐེག་བྱེད་འདུག

ང་ཚོས་མིག་རྒྱང་མ་འོངས་པར་འཕེན་དགོས་རྐྱེན། ང་ཚོས་གྲོང་སྡེའི་འགོ་ཁྲིད་ནས་སློབ་ཆུང་དགེ་རྒན་དང་། རྫོང་དང་ཞིང་ཆེན་རིམ་པའི་འཕྲོད་བསྟེན་ལས་བྱེད་པ་ནས་ལྷན་ཁང་ཁག་གི་དཔོན་པོ་ཁག་ཚུན་ཆད་ཀྱི་སྤྱི་ཚོགས་ཐོག་གི་རིམ་པ་སོ་སོར་ད་སྔ་བཙུགས་པའི་མཉམ་འབྲེལ་མཐུན་གྲོགས་འབྲེལ་བ་མུ་མཐུད་དུ་ཡར་རྒྱས་སུ་གཏོང་གི་ཡོད། འདས་པའི་བྱ་བ་ལས་བསླབ་བྱ་ལེན་པ་དང་་མིག་ཟུང་གོ་སྐབས་དང་དཀའ་ངལ་གསར་པ་ཁག་ལ་ཕྱོགས་པའི་སྒོ་ནས།ང་ཚོས་རྟག་བརྟན་གྱི་ཞབས་རྗེས་ཤིག་འཇོག་ཕྱིར་མུ་མཐུད་དུ་གཞན་དང་མཉམ་འབྲེལ་སྒོས་ལས་ཀ་བྱེད་ཅིང་། མཚར་སྡུག་འོད་སྟོང་འབར་བའི་རིག་གནས་ཤིག་ལ་གསོན་ཤུགས་སྤེལ་ཏེ་དེའི་ངོ་མཚར་ལ་རོལ།

ཡར་རྒྱས་ལས་ཀའི་སྙིང་བོ་མདོར་བསྡུས་ན།དེ་ནི་འགྲོ་བ་མི་རྣམས་ཀྱིས་ཕན་ཚུན་ལ་རོགས་འདེགས་བྱེད་པའི་སྒོ་ནས་ང་ཚོའི་མ་འོངས་པའི་ཆེད་དུ་སྤྱི་མཐུན་གྱི་མི་ཆོས་རིང་ལུགས་ཀྱི་འཇིག་རྟེན་ཞིག་བསྐྲུན་རྒྱུ་དེ་རེད།

ཀུན་ཕན་གྱི་སྐོར།

ཚོགས་གཙོའི་གསུང་འཕྲིན།

ཀུན་ཕན་ཐེབས་རྩ་ཚོགས་པའི་ཚོགས་གཙོས་གནང་བའི་གསུང་འཕྲིན།

ཅིའི་ཕྱིར་ "Trace" ཞེས་འབོད།

ང་ཚོའི་མིང་གི་འགྲེལ་བཤད་དང་དེས་ང་ཚོའི་ལས་སྒོའི་ཁྱབ་ཚད་ཇི་ལྟར་འགྲེལ།

དམིགས་ཡུལ་དང་ལམ་སྟོན་གྱི་རྩ་དོན།

ང་ཚོས་ཅི་ཞིག་སྒྲུབ་པ་དང་ཇི་ལྟར་སྒྲུབ་པ།

ནང་ལ་ཞུགས་པ།

ཀུན་ཕན་ཐེབས་རྩ་ཚོགས་པ་ན་ཡོད་པའི་གོ་སྐབས་སྐོར་གྱི་གནས་ཚུལ།

ལོ་འཁོར་གྱི་སྙན་བསྡོམས།

ང་ཚོའི་ལས་ཀ་དང་སྔོན་རྩིས་ཐོག་གི་ལོ་རེའི་སྤྱི་སྡོམ།

ལས་ཀ།

ཀུན་ཕན་ཐེབས་རྩ་ཚོགས་པར་ཡོད་པའི་ད་ལྟའི་ལས་ཞུགས་གོ་སྐབས།

“ཡར་རྒྱས་ཟེར་བ་ནི་མདོར་བསྡུས་ཏེ་བཤད་ན་མི་ཚེའི་སྤུས་ཀ་མཐོར་འདེགས་སུ་གཏོང་རྒྱུ་དེ་རེད།”