• མདུན་ཤོག
• ཀུན་ཕན་གྱི་སྐོར།
• ལས་གཞི།
•  རོགས་དངུལ་དང་རྒྱབ་སྐྱོར།
•  ཚོགས་འདུ།
•  གསར་འགྱུར།
•    རྒྱུ་ཆ།

     སློབ་གསོ། | ཞིང་འབྲོག་ཡར་རྒྱས། | འཕྲོད་བསྟེན། | རིག་གནས།

ལས་གཞིའི་སྤྱི་དོན། བོད་ཀྱི་ཕ་སྐད་མཐོ་རིམ་སློབ་གྲྭའི་སློབ་གསོ་ཡར་རྒྱས་གཏོང་བའི་ལས་གཞི།

ལས་གཞིའི་དམིགས་ཡུལ་དང་ནང་དོན།

ཀུན་ཕན་ཐེབས་རྩ་ཚོགས་པའི་བོད་ཀྱི་ཕ་སྐད་མཐོ་རིམ་སློབ་གསོའི་སློབ་གླིང་ཡར་རྒྱས་གཏོང་བའི་ལས་གཞི་ཞེས་པ་འདི་ནི། བོད་ ཀྱི་ས་ཁུལ་ཁག་ཡར་རྒྱས་གཏོང་བར་གནད་འགག་ཆེ་བའི་མཐོ་རིམ་སློབ་གྲྭའི་བོད་སྐད་ཀྱི་སློབ་གཞི་དང་སློབ་ཚན་རྣམས་རྒྱ་སྐྱེད་གཏོང་བར་དམིགས་ནས་འཆར་འགོད་བྱས་པ་ཞིག་ཡིན། ཀུན་ཕན་ཐེབས་རྩ་ཚོགས་པས་ལས་གཞི་འདི་མ་སྤེལ་གོང་ལ། བོད་ཡིག་སྡེ་ཚན་མང་ཆེ་བ་ཞིག་ཏུ་སློབ་མ་ཚོར་བོད་ཀྱི་སྐད་ཡིག་དང་རྩོམ་རིག་གི་ཁྱབ་ཁོངས་ཁོ་ན་མ་གཏོགས་སློབ་གཉེར་བྱེད་རྒྱུ་མེད་པས། དེས་མཐོ་རིམ་སློབ་གྲྭ་ཁག་ལ་བོད་སྐད་ཀྱིས་སློབ་ཁྲིད་བྱེད་པའི་སྦྱོང་གཞི་རྣམས་ཁྱབ་ཁོངས་འདི་ལས་བརྒལ་ཏེ་རྒྱ་སྐྱེད་གཏོང་བར་ཚད་བཀག་ངེས་ཅན་ཞིག་ཐེབས་ཡོད། དེར་བརྟེན་ཀུན་ཕན་ཐེབས་རྩ་ཚོགས་པས་མཐོ་རིམ་སློབ་གྲྭ་ཁག་ཏུ་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བར་མེད་དུ་མི་རུང་བའི་བོད་སྐད་ཀྱིས་སློབ་ཁྲིད་བྱེད་པའི་སློབ་ཚན་ཁག་རྒྱ་སྐྱེད་གཏོང་བར་རྒྱུ་དངུལ་དང་ལག་ལེན་གཉིས་ཀའི་ཐོག་ནས་རོགས་སྐྱོར་བྱེད་རྒྱུ་ཡིན།

ལས་གཞིའི་འགྲེལ་བཤད།

བོད་ཀྱི་ཕ་སྐད་མཐོ་རིམ་སློབ་གྲྭའི་སློབ་གསོ་ཡར་རྒྱས་གཏོང་བའི་ལས་གཞི་འདི་བརྒྱུད་དེ། ཀུན་ཕན་ཐེབས་རྩ་ཚོགས་པས་མཚོ་སྔོན་དང་། སི་ཁྲོན། ཀན་སུའུ་བཅས་ཀྱི་སྣེ་ཁྲིད་སློབ་གྲྭ་ཆེན་མོ་ཁག་དང་མཉམ་འབྲེལ་གྱིས། བོད་ཀྱི་ཕ་སྐད་ཀྱི་སློབ་གསོ་འདི་ཉིད་ཚོང་ལས་དོ་དམ་དང་། གློག་ཀླད་ཤེས་བྱ། ཁྲིམས་ལུགས། བོད་སྨན་བཅས་ཀྱི་ཁྱབ་ཁོངས་སུ་རྒྱ་སྐྱེད་གཏོང་རྒྱུ་ཡིན། ལས་གཞི་འདིའི་མཉམ་འབྲེལ་ལས་རོགས་ཁག་གིས་སློབ་གཉེར་ཁྱབ་ཁོངས་འདི་དག་གི་སློབ་ཚན་རྣམས་རྒྱ་སྐྱེད་གཏོང་བར་ཆོད་སེམས་ཆེ་ན་ཡང་ཁོང་ཚོར་དེའི་ཐད་ལ་འགོག་རྐྱེན་འཕྲད་ཡོད། རྒྱུ་མཚན་ནི་ཁོང་ཚོར་སློབ་ཚན་གྱི་ཤེས་བྱ་དང་བོད་ཀྱི་སྐད་ཡིག་གི་ཐོག་ནས་ཚད་ལྡན་གྱི་དགེ་རྒན་དང་ལས་བྱེད་ཀྱི་དཔུང་ཁག་ཅིག་མེད་པ་མ་ཟད། དགེ་ལས་རྣམས་ལ་དགོས་ངེས་ཀྱི་སྦྱོང་བརྡར་སྤྲོད་པའི་མཐུན་རྐྱེན་ཡང་ཞན། དེ་མ་ཟད་སློབ་ཚན་དེ་དག་སྦྱོང་བར་བོད་ཡིག་གི་སློབ་དེབ་མང་བོ་མེད་ཅིང་། སློབ་ཚན་གསར་བ་སྦྱོང་བའི་བོད་ཡིག་གི་སློབ་དེབ་དེ་བས་ཀྱང་དཀོན་པོ་ཡིན། དེར་བརྟེན། ཀུན་ཕན་ཐེབས་རྩ་ཚོགས་པས་ལས་གཞི་འདི་བརྒྱུད་དེ་དགེ་རྒན་ལ་སྦྱོང་བརྡར་སྤྲོད་པ་དང་། སློབ་དེབ་རྩོམ་སྒྲིག་དང་འགྲེམས་སྤེལ། མཆོག་ཏུ་གྱུར་བའི་སློབ་ཁྲིད་བྱེད་ཐབས་སྐུལ་སློང་བྱེད་པ་བཅས་ཀྱི་སྒོ་ནས་གོང་གསལ་སྦྱོང་གཞིའི་སྡེ་ཚན་ཁག་དང་སློབ་ཚན་རྣམས་འཛུགས་སྐྲུན་དང་འཕེལ་རྒྱས་གཏོང་བར་རྒྱབ་སྐྱོར་བྱེད་རྒྱུ་ཡིན། ལས་གཞི་འདིས་སློབ་གྲྭའི་ཡར་རྒྱས་དང་ལས་རིམ་ཁག་འཐུས་ཚང་དུ་གཏོང་བར་གཙོ་བོ་གཤམ་གསལ་སློབ་ཚན་ཁག་གི་ཐོག་ལ་དམིགས་ཡོད།

• ཁྲིམས་ལུགས།
• ཚོང་ལས་དོ་དམ།
• ཚན་རིག
• གློག་ཀླད་ཤེས་བྱ།
• བོད་སྨན།

ལས་སྒོ་དང་གྲུབ་འབྲས།

ཁྲིམས་ལུགས་ཀྱི་སློབ་གཞིའི་ཐོག་ལ་ཤུགས་སྣོན།

དགེ་རྒན་སྦྱོང་བརྡར།

• ཁྲིམས་ལུགས་དགེ་རྒན་ ༡༧ གྱིས་ཁོང་ཚོའི་ཤེས་ཚད་ལག་འཁྱེར་གྱི་རིམ་པ་མཐོར་འདེགས་བྱས། དགེ་རྒན་ ༡༧ གྱིས་ཁྲིམས་ལུགས་ཐོག་ལ་སློབ་གྲྭ་ཆེན་མོའི་དངོས་གཞིའི་ཚད་རིམ་གྱི་འཛིན་ཡིག་བླངས་ཏེ། ད་ལྟ་མཚོ་སྔོན་ཉེན་རྟོག་ལས་རིགས་སློབ་གྲྭ་དང་། གཙོས་དགེ་ཐོན་སློབ་གྲྭ། ནུབ་བྱང་མི་རིགས་སློབ་གྲྭ་ཆེན་མོ་བཅས་སུ་ཁྲིམས་ལུགས་ཀྱི་སློབ་ཚན་ཁག་སློབ་ཁྲིད་བྱེད་བཞིན་ཡོད།
• ཁྲིམས་ལུགས་སློབ་གསོའི་ཚོགས་འདུ་འཚོགས། མཚོ་སྔོན་ཉེན་རྟོག་ལས་རིགས་སློབ་གྲྭའི་དགེ་སློབ་རྣམས་ཁྲིམས་ལུགས་ཀྱི་ནང་གསེས་དབྱེ་བ་ ༡༤ ཐོག་ལ་ཁྲིམས་ལུགས་སློབ་གསོའི་ཚོགས་འདུར་ཞུགས།

སློབ་དེབ་དཔེ་སྐྲུན་དང་འགྲེམས་སྤེལ།

• བོད་ཡིག་གི་ཁྲིམས་ལུགས་སློབ་དེབ་གསར་བ་ ༡༢ རྩོམ་སྒྲིག་བྱས། ཁྲིམས་ལུགས་སློབ་དེབ་ ༡༡ བོད་ཡིག་ཏུ་ཕབ་སྒྱུར་གྱིས་ད་ལྟ་པར་སྐྲུན་བྱེད་མུས་ཡིན། ༢༠༠༨ ལོར་འདིའི་ཁ་སྣོན་དུ་སློབ་དེབ་གཞན་ཞིག་པར་སྐྲུན་བྱེད་རྒྱུ་ཡིན།

ཕུལ་བྱུང་དགེ་རྒན་གྱི་གཟེངས་རྟགས།

• གཙོས་དགེ་ཐོན་སློབ་གྲྭ་དང་མཚོ་སྔོན་ཉེན་རྟོག་ལས་རིགས་སློབ་གྲྭ་གཉིས་སུ་ཕུལ་བྱུང་དགེ་རྒན་བདམས། གཙོས་དགེ་ཐོན་སློབ་གྲྭ་དང་མཚོ་སྔོན་ཉེན་རྟོག་སློབ་གྲྭ་གཉིས་སུ་བོད་སྐད་ཀྱིས་ཁྲིམས་ལུགས་སློབ་ཁྲིད་བྱེད་མཁན་གྱི་ཕུལ་བྱུང་དགེ་རྒན་ཁག་ཅིག་ལ་བྱ་དགའི་གཟེངས་རྟགས་སྤྲད་དེ། བོད་སྐད་ཀྱིས་སློབ་ཁྲིད་བྱེད་པའི་མཐུན་རྐྱེན་འཕེལ་རྒྱས་གཏོང་བར་རོགས་སྐྱོར་བྱས།

ཚོང་ལས་དོ་དམ་གྱི་སློབ་གཞིའི་ཐོག་ལ་ཤུགས་སྣོན།

དགེ་རྒན་སྦྱོང་བརྡར།

• ཚོང་ལས་དོ་དམ་གྱི་དགེ་རྒན་ ༡༡ ལ་སྦྱོང་བརྡར་སྤྲད། སློབ་གྲྭ་ཁག་ཁ་ཤས་ནས་ཡོང་བའི་དགེ་རྒན་ ༡༡ གིས་ཚོང་ལས་དོ་དམ་སྐོར་གྱི་སྦྱོང་བརྡར་ལེགས་འགྲུབ་བྱས། ཚོང་ལས་དོ་དམ་གྱི་ཐོག་ལ་དགེ་རྒན་གཉིས་ཀྱིས་ཞིབ་འཇུག་སློབ་མའི་ཤེས་ཚད་དང་དགེ་རྒན་གཅིག་གིས་འབུམ་རམས་པའི་ཤེས་ཚད་མཐར་ཕྱིན་པར་བྱས། དགེ་རྒན་འདི་དག་གིས་ད་སྐབས་ནུབ་བྱང་མི་རིགས་སློབ་གྲྭ་ཆེན་མོ་དང་། མཚོ་སྔོན་དགེ་ཐོན་སློབ་གྲྭ་ཆེན་མོ་རུ་ཚོང་ལས་དོ་དམ་གྱི་སློབ་ཁྲིད་བྱེད་བཞིན་ཡོད།

སློབ་དེབ་དཔེ་སྐྲུན་དང་འགྲེམས་སྤེལ།

• བོད་ཡིག་གི་ཚོང་ལས་དོ་དམ་གྱི་སློབ་དེབ་ ༡༤ རྩོམ་སྒྲིག་བྱས། ཚོང་ལས་དོ་དམ་གྱི་སློབ་དེབ་ ༡༠ པར་སྐྲུན་གྱིས་ནུབ་བྱང་མི་རིགས་སློབ་གྲྭ་ཆེན་མོ་དང་མཚོ་སྔོན་བོད་སྨན་སློབ་གྲྭ་ཆེན་མོའི་སློབ་དེབ་དུ་བེད་སྤྱོད་བྱས་དང་བྱེད་བཞིན་ཡོད་ལ། སློབ་དེབ་ཁ་སྣོན་གཞན་པ་བཞི་ད་ཆ་པར་སྐྲུན་བྱེད་མུས་ཡིན།

ཕུལ་བྱུང་དགེ་རྒན་གྱི་གཟེངས་རྟགས།

• ནུབ་བྱང་མི་རིགས་སློབ་གྲྭ་ཆེན་མོ་རུ་ཕུལ་བྱུང་དགེ་རྒན་བདམས། ནུབ་བྱང་མི་རིགས་སློབ་གྲྭ་ཆེན་མོས་བོད་སྐད་ཀྱིས་ཁྲིམས་ལུགས་སློབ་ཁྲིད་བྱེད་མཁན་གྱི་དགེ་རྒན་ཕུལ་དུ་བྱུང་བ་ཁག་ཅིག་ལ་བྱ་དགའི་གཟེངས་རྟགས་སྤྲད་དེ། བོད་སྐད་ཀྱིས་སློབ་ཁྲིད་བྱེད་པའི་མཐུན་རྐྱེན་འཕེལ་རྒྱས་གཏོང་བར་རོགས་སྐྱོར་བྱས།

དབྱིན་ཡིག་སྦྱོང་བརྡར།

• དབྱིན་ཡིག་གི་སློབ་ཁྲིད་ཡར་རྒྱས་བཏང་། ནུབ་བྱང་མི་རིགས་སློབ་གྲྭ་ཆེན་མོ་རུ་དབྱིན་ཡིག་གི་དགེ་རྒན་ ༢ བསྡུས་ཏེ་ཚོང་ལས་དོ་དམ་གྱི་སྐོར་སྦྱོང་མཁན་སློབ་མ་ཚོའི་དབྱིན་ཡིག་གི་བྱང་ཚད་ཡར་རྒྱས་གཏོང་བར་རོགས་རམ་བྱས།

ཚན་རིག་གི་སྦྱོང་གཞིའི་ཐོག་ལ་ཤུགས་སྣོན།

དགེ་རྒན་སྦྱོང་བརྡར།

• ཚན་རིག་གི་དགེ་རྒན་ ༧༠ ཡིས་ཁོང་ཚོའི་ཤེས་ཚད་ཀྱི་ལག་འཁྱེར་རིམ་པ་མཐོར་འདེགས་བྱས། རྩིས་རིག་གི་དགེ་རྒན་ ༢༥ དང་དངོས་ལུགས་ཀྱི་དགེ་རྒན་ ༢༥ རྫས་འགྱུར་གྱི་དགེ་རྒན་ ༢༠ བཅས་ཀྱིས་ཞིབ་འཇུག་སློབ་མའི་ཤེས་ཚད་དང་འདྲ་མཚུངས་ཀྱི་ལག་འཁྱེར་བླངས་ཏེ། ད་ལྟ་ནུབ་བྱང་མི་རིགས་སློབ་གྲྭ་ཆེན་མོ་དང་། གཙོས་དགེ་ཐོན་སློབ་གྲྭ མཚོ་སྔོན་མི་རིགས་དགེ་ཐོན་སློབ་གླིང་། མཚོ་ལྷོ་དགེ་ཐོན་སློབ་གྲྭ འབར་ཁམས་དགེ་ཐོན་སློབ་གྲྭ ཀན་ལྷོ་དགེ་ཐོན་སློབ་གྲྭ རྨ་ལྷོ་དགེ་ཐོན་སློབ་གྲྭ་བཅས་སུ་ཚན་རིག་སློབ་ཁྲིད་བྱེད་བཞིན་ཡོད།

ཕུལ་བྱུང་དགེ་རྒན་གྱི་གཟེངས་རྟགས།

• མཚོ་སྔོན་དགེ་ཐོན་སློབ་གྲྭ་ཆེན་མོ་རུ་ཕུལ་བྱུང་དགེ་རྒན་བདམས། མཚོ་སྔོན་དགེ་ཐོན་སློབ་གྲྭ་ཆེན་མོས་ཚན་རིག་དང་གློག་ཀླད་སློབ་ཁྲིད་བྱེད་མཁན་གྱི་དགེ་རྒན་ཕུལ་དུ་བྱུང་བ་ཚོར་བྱ་དགའི་གཟེངས་རྟགས་སྤྲད་དེ། བོད་སྐད་ཀྱིས་སློབ་ཁྲིད་བྱེད་པའི་མཐུན་རྐྱེན་འཕེལ་རྒྱས་གཏོང་བར་རོགས་སྐྱོར་བྱས།

གློག་ཀླད་ཤེས་བྱའི་སྦྱོང་གཞིའི་ཐོག་ལ་ཤུགས་སྣོན།

དགེ་རྒན་སྦྱོང་བརྡར།

• གློག་ཀླད་ཤེས་བྱའི་དགེ་རྒན་ ༢༠ ཡིས་ཁོང་ཚོའི་ཤེས་ཚད་ཀྱི་ལག་འཁྱེར་རིམ་པ་མཐོར་འདེགས་བྱས། གློག་ཀླད་ཤེས་བྱའི་དགེ་རྒན་ ༢༠ ཡིས་ཞིབ་འཇུག་སློབ་མའི་ཚད་ཀྱི་སྦྱོར་བརྡར་ལེགས་འགྲུབ་བྱས། མི་ ༡༧ ཀྱིས་ཞིབ་འཇུག་སློབ་མའི་ཤེས་ཚད་ཀྱི་ལག་འཁྱེར་བླངས་ཏེ། ད་ལྟ་མཚོ་སྔོན་དགེ་ཐོན་སློབ་གྲྭ་ཆེན་མོ་དང་། གཙོས་དགེ་ཐོན་སློབ་གྲྭ ལྷོ་ནུབ་མི་རིགས་སློབ་གྲྭ་ཆེན་མོ། སི་ཁྲོན་ཞིང་ཆེན་བོད་ཡིག་ཞིབ་འཇུག་ཁང་བཅས་སུ་གློག་ཀླད་ཀྱི་ཤེས་བྱ་སློབ་ཁྲིད་བྱེད་བཞིན་ཡོད།

སློབ་དེབ་ཡིག་སྒྱུར་དང་དཔེ་སྐྲུན།

• གློག་ཀླད་ཤེས་བྱའི་བོད་ཡིག་གི་སློབ་དེབ་གསར་བ། གློག་ཀླད་ཤེས་བྱའི་སློབ་དེབ་ཅིག་བོད་ཡིག་ཏུ་བསྒྱུར་ཏེ་པར་སྐྲུན་བྱས་ཟིན་ཞིང་། དེ་མཚོ་སྔོན་དགེ་ཐོན་སློབ་གྲྭ་དང་། མཚོ་སྔོན་མི་རིགས་ཞིབ་འཇུག་ཁང་ (QinghaiNationalitiesInstitute།) ལྷོ་ནུབ་མི་རིགས་སློབ་གྲྭ་ཆེན་མོ། སི་ཁྲོན་ཞིང་ཆེན་བོད་ཡིག་ཞིབ་འཇུག་ཁང་བཅས་སུ་སློབ་དེབ་དུ་བེད་སྤྱོད་བྱས་དང་བྱེད་བཞིན་ཡོད།

བོད་སྨན་གྱི་ལས་རིམ་ཐོག་ལ་ཤུགས་སྣོན།

སློབ་དེབ་ཡིག་སྒྱུར་དང་དཔེ་སྐྲུན།

• བོད་སྨན་གྱི་སློབ་དེབ་ ༢༦ པར་སྐྲུན་བྱས། བོད་སྨན་གྱི་སློབ་དེབ་ ༢༦ རྩོམ་སྒྲིག་དང་པར་སྐྲུན་བྱས་ཏེ། མཚོ་སྔོན་བོད་སྨན་སློབ་གྲྭ་ཆེན་མོ་དང་བོད་ལྗོངས་སྨན་རྩིས་ཁང་། སི་ཁྲོན་བོད་སྨན་ཁང་། ཀན་སུའུ་བོད་སྨན་ཁང་བཅས་སུ་བོད་སྨན་སློབ་ཁྲིད་ཀྱི་སློབ་དེབ་དུ་བེད་སྤྱོད་བྱེད་བཞིན་ཡོད།
• ཕྱི་རྒྱལ་གྱི་སྨན་གྱི་སློབ་དེབ་ ༢༨ བོད་ཡིག་ཏུ་བསྒྱུར། ཀུན་ཕན་ཐེབས་རྩ་ཚོགས་པ་དང་ཅིན་ཁི་(Jinke)བོད་སྨན་ཀུང་ཟི་གཉིས་ཀྱི་རོགས་སྐྱོར་འོག མཚོ་སྔོན་བོད་སྨན་སློབ་གྲྭ་ཆེན་མོས་ཕྱི་རྒྱལ་གྱི་སྨན་གྱི་སློབ་དེབ་ ༢༨ བོད་སྨན་སློབ་ཁྲིད་ཀྱི་ལས་རིམ་ཁྲོད་དུ་བེད་སྤྱོད་བྱེད་པར་དེའི་ཡིག་སྒྱུར་གྱི་བྱ་བར་མཐུན་སྦྱོར་བྱེད་བཞིན་ཡོད། ད་བར་དུ་སློབ་དེབ་ ༡༦ ཡིག་སྒྱུར་བྱས་ཟིན་ལ་ ༡༢ མུ་མཐུད་ནས་ཡིག་སྒྱུར་བྱེད་མུས་ཡིན།

དགེ་རྒན་ཕུལ་བྱུང་གི་གཟེངས་རྟགས།

• མཚོ་སྔོན་བོད་སྨན་སློབ་གྲྭ་ཆེན་མོར་ཕུལ་བྱུང་གི་དགེ་རྒན་བདམས། མཚོ་སྔོན་བོད་སྨན་སློབ་གྲྭ་ཆེན་མོས་དགེ་རྒན་ཕུལ་བྱུང་གཉིས་ལ་བྱ་དགའི་གཟེངས་རྟགས་སྤྲད་དེ། བོད་སྐད་ཀྱིས་སློབ་ཁྲིད་བྱེད་པའི་མཐུན་རྐྱེན་འཕེལ་རྒྱས་གཏོང་བར་རོགས་སྐྱོར་བྱས།

སློབ་གཉེར་ཁང་གི་འཕེལ་རྒྱས།

• སློབ་གཞིའི་སྡེ་ཚན་འཕེལ་རྒྱས་སྐོར་གྱི་ཟབ་སྦྱོང་གཉིས་བཀོད་སྒྲིག་བྱས། ༢༠༠༥ དང་ ༢༠༠༦ གཉིས་ལ་ཟི་ལིང་དུ་སློབ་གྲྭ་ཆེན་མོའི་དགེ་རྒན་དང་ལས་བྱེད་ཚོ་དང་ལྷན་དུ། ནུབ་བྱང་མི་རིགས་སློབ་གྲྭ་ཆེན་མོ་དང་། མཚོ་སྔོན་དགེ་ཐོན་སློབ་གྲྭ་ཆེན་མོ། མཚོ་སྔོན་བོད་སྨན་སློབ་གྲྭ་ཆེན་མོ། མཚོ་སྔོན་ཉེན་རྟོག་ལས་རིགས་སློབ་གྲྭ རྨ་ལྷོ་དགེ་ཐོན་སློབ་གྲྭ་བཅས་སུ་གློག་ཀླད་ཀྱི་ཤེས་བྱ་དང་། ཁྲིམས་ལུགས། ཚོང་ལས་དོ་དམ་བཅས་ཀྱི་སྦྱོང་གཞི་ཁག་གི་ཐོག་ལ་མུ་མཐུད་ནས་རོགས་སྐྱོར་དང་འཕེལ་རྒྱས་གཏོང་ཕྱོགས་ཀྱི་བགྲོ་གླེང་བྱས།

 

ལས་གཞིའི་གནས་ཚུལ་སྙིང་སྡུས།

དུས་ཡུན།  ༢༠༠༠ ལོའི་སྤྱི་ཟླ་དང་པོ་ནས་ ༢༠༠༦ ལོའི་སྤྱི་ཟླ་བཅུ་གཉིས།

དངུལ་རྩིས། (༢༠༠༤ ནས་ ༢༠༠༧ བར་དུ)   ཨ་སྒོར་ ༨༨༨།༧༤༨ (དངུལ་གྲངས་འདིའི་ནང་དུ་ཀུན་ཕན་ཐེབས་རྩ་ཚོགས་པའི་རོགས་དངུལ་ཨ་སྒོར་ ༥༢༨།༡༦༩ འདུས་ཤིང་། དེས་སྤྱི་བསྡོམས་ཀྱི་བརྒྱ་ཆ་ ༥༩ ཟིན)

ས་གནས།
མཚོ་སྔོན་དང་ཀན་སུའུ། སི་ཁྲོན་ཞིང་ཆེན།

བོད་ཀྱི་ཕ་སྐད་མཐོ་རིམ་སློབ་གྲྭའི་སློབ་གསོ་ཡར་རྒྱས་གཏོང་བའི་ལས་གཞིའི་མཉམ་འབྲེལ་ལས་རོགས་ཁག་གི་མཚན་ཐོ།

ལས་རོགས་གཙོ་བོ།

• ཀན་ལྷོ་ཁུལ་གྱི་གཙོས་དགེ་ཐོན་སློབ་གྲྭ
• ཟི་ལིང་གྲོང་ཁྱེར་གྱི་མཚོ་སྔོན་མི་རིགས་དགེ་ཐོན་སློབ་གླིང་།
• ལན་ཀྲུའུ་གྲོང་ཁྱེར་གྱི་ནུབ་བྱང་མི་རིགས་སློབ་གྲྭ་ཆེན་མོ།
• ཟི་ལིང་གྲོང་ཁྱེར་གྱི་མཚོ་སྔོན་དགེ་ཐོན་སློབ་གྲྭ་ཆེན་མོ།
• ཟི་ལིང་གྲོང་ཁྱེར་གྱི་མཚོ་སྔོན་ཉེན་རྟོག་ལས་རིགས་སློབ་གྲྭ

ལས་རོགས་ཁ་སྣོན་གཞན།

• ལན་ཀྲུའུ་གྲོང་ཁྱེར་བོད་ཀྱི་ཤེས་རིག་འཕེལ་རྒྱས་ལྷན་ཚོགས། (TCEDA)
• མཚོ་ལྷོ་ཁུལ་དགེ་ཐོན་སློབ་གྲྭ
• ཁྲིན་ཏུའུ་གྲོང་ཁྱེར་ནུབ་ལྷོ་མི་རིགས་སློབ་གྲྭ་ཆེན་མོ།
• རྨ་ལྷོ་ཁུལ་དགེ་ཐོན་སློབ་གྲྭ
• དཀར་མཛེས་ཁུལ་གྱི་སི་ཁྲོན་ཞིང་ཆེན་བོད་ཡིག་ཞིབ་འཇུག་ཁང་།
• ལྷ་ས་གྲོང་ཁྱེར་གྱི་བོད་ལྗོངས་སྨན་རྩིས་ཁང་།
• རྔ་བ་ཁུལ་འབར་ཁམས་རྫོང་དགེ་ཐོན་སློབ་གྲྭ།
• དཀར་མཛེས་ཁུལ་སི་ཁྲོན་བོད་སྨན་ཁང་།
• ཀན་ལྷོ་ཁུལ་དགེ་ཐོན་སློབ་གྲྭ
• གཙོས་གྲོང་ཁྱེར་གྱི་ཀན་སུའུ་བོད་སྨན་ཁང་།
• ཟི་ལིང་གྲོང་ཁྱེར་གྱི་མཚོ་སྔོན་བོད་སྨན་སློབ་གྲྭ་ཆེན་མོ།

 

 

• མདུན་ཤོག |
•  ཀུན་ཕན་གྱི་སྐོར། |
•  ལས་གཞི། |
•  རོགས་རམ་ལེན་སྟངས། |
•  རྒྱུ་ཆ། |
•  རོགས་དངུལ། |
•  གསར་འགྱུར།

• འཚོལ་བ། |
•  དྲ་ཤོག་གི་ས་བཀྲ། |
•  ང་ཚོར་འབྲེལ་གཏུགས་གནང་ས། |
•  ཚོགས་མི།

 

 

 

 

པར་དབང་ཡོད་ཚད་ཀུན་ཕན་ཐེབས་རྩ་ཚོགས་པའི་དྲ་བར་དབང་བས་གཞན་གྱིས་རང་དགར་སྤྱོད་མི་ཆོག